जेरेत् टुटी हूलगा़रकोआ़ञ

लाच् रे बा़नुक् दाना,
बा़नुक् हो़ड़मो़रे लुगड़ी,
बो़हो़क् उमूल चातो़म,
हो़यते ओटाङ आत्एन।
चेकायता़मा़ञ चाम्पा-बादोली,
चेकायता़मा़ञ बारो़ दोलान?
लादा़ञ सेञ रापागा,
आमाक् किसा़-का़हनी।
हानको ञेलकोम टुईला़,
न्हाते गो़दो़र गोचो,
झा़पुत् केदिञको देने-बानार,
दिपिला़दिञको हेन्दे टुकुच्,
हेलाविना़ञ नामाल का़मी।
इमा़ञ बापधो़न इमा़ञमे से,
आकेल रेआक् दुगुर सेंगेल,
मित् मित् ते सानाम बा़ईरी, 

जेरेत् टुटी हूलगा़रकोआ़ञ।

BAŃCAOLEM BABA

Oka ńumteń ńumme Baba?

Oka buliteń pukạrme?

Rak̕ chaḍa oka hõ̱ bạnuk̕tiń,

Ho̱mo̱r chaḍa bạnuk̕tiń pạrsi.

Meṭaotińme digdhạ ińak̕,

Ho̱po̱n amren kạnạń se̱ baṅ?

Pujại than hõ̱ ạḍitam,

Taṛam taṛamre piṇḍtam,

Nana rup nana ro̱ṅ,

Hataṅ ińak̕ ạulạuen,

Amaṅ menamreń digdhạen.

Cae kho̱n hõ̱m bahe̱rkeťle,

Madho̱ Siń hõ̱m piḍgạuaťle,

Aso̱k̕ ṭayo̱k̕kanle Baba,

Ceka noa amak̕ kạrdhạni?

Kho̱j Kaman se̱ṅge̱l dak̕,

Ạurie aso̱ṛ nit hõ̱,

Haṭak̕te are̱c̕eť nit hõ̱,

Ale talare jaḍame jaḍam.

Ko̱clo̱n birudre holage,

Sar-kạpi malkaoleťle,

Hul se̱ṅge̱lle salgaoleť.

Hapṛamkoak̕ mãyãm kạlite,

Khõ̱ṇḍ begaren ḍiṇḍạ aleak̕.

Re̱c̕keťleko ḍiṇḍạ Baba,

Do̱kho̱lkeťtaleko disạm Baba.

Kena-Beca sagal-sagal,

Jo̱l-jumi, mĩhũ-me̱ro̱m,

Sanam Babako ḍiglạukeťko.

Rak̕ aleak̕, ho̱mo̱r aleak̕,

Ańjo̱mkatalem amge Baba,

Amge Baba bańcaokalem!

BAṄGEM TAHẼ̱NA HO̱Ṛ HO̱PO̱N

Mẽ̱t̕dak̕ge ṭo̱ṛo̱go̱k̕kan hae!
Umạr reak̕ noa hạsur anacurre,
Campa-Badoli ar Citri disạlere,
Hiḍir-hiḍir hae ban bạsien!
Purkhạkoak̕ co̱l durib,
Miť miťte hasa lataren,
Hae iń sudhạń aṅge̱n aťen!
Lạṛhại-lạpạṛhại sạrdi se̱ṅge̱len,
Bo̱ko̱-boeha talare tarwaṛe,
Lo̱ho̱ť laṭ paṭaoen jive̱ť mãyãmte.
Ho̱mo̱r halaṅeťko era-ho̱po̱n,
So̱maj go̱ hõ̱e gạrsilo̱mena,
Hae ho̱po̱niń cedak̕ko mapak̕?
Bo̱rno̱re o̱no̱l bạnuk̕ ce̱ťge,
Pachnao bạnuk̕ jạt-kujạt,
Pạris hõ̱ co̱ bạnuk̕ o̱l,
Amak̕ bo̱rno̱ sapha pĩṛĩť,
Cak̕ to̱be̱m potaoeť?
Amak̕ bo̱rno̱ arak̕ mãyãmte.
Judi niạ dho̱co̱r tahẽ̱yena amak̕,
Gapam ńamok̕a ciṛiạkhanare,
Jae jug lạgiť noa pirthimi kho̱n,
Ať apať ado̱k̕am tirikal lạgiť,

Baṅgem tahẽ̱na am Ho̱ṛ ho̱po̱n.

HAERE, HAERE, HAERE MANEWA!

De̱sre do̱ disạmre do̱ haere manewa!
Haere, haere, disạm manewa,
Cete lạgit̕ko kạuạ rạuạkan?
Ańjo̱mpe họ dhạrti manewa,
Cete lạgit̕ko ho̱mo̱r halaṅkan?
Ate̱npe họ disạm manewa,
Haere, haere, haere bachare, dhạrtire do̱
Le̱me̱ń tejoko upạlakan họ.

Bạnuk̕tako họ jeleń gạdi hõ̱,
Bạnuk̕tako họ uḍạuk̕ gadi hõ̱,
Ho̱e lekako ạpira,
Goṭa disạmko dham dhase̱rkeť.

Le̱me̱ń tejoge Ko̱ro̱na họ,
Ạḍige co̱ko bo̱to̱rana họ,
Haere, haere, haere bachare, dhạrtire do̱
Le̱me̱ń tejoko chạplạuena họ.

Jak̕lere Ko̱ro̱na họ,
Jo̱ṭe̱t̕lere Ko̱ro̱na họ,
Ucạṛ-nacaṛ Ko̱ro̱na họ,
Ko̱ro̱na do̱ ho̱e ruạ kan.
Sińregebon tahe̱na họ,
Po̱ṭo̱mrege họ bańcao menak̕a,
Siń Po̱ṭo̱m hukum dela họ,
Noa babon do̱ho̱ lo̱ṭo̱m họ.

Ko̱ro̱na kho̱n bańcaok̕ lạgiť họ,
Ko̱ro̱na kho̱n rophak̕ lạgiť họ,
Tahe̱nabon họ Siń Po̱ṭo̱m,
Ạuṛi sạuṛi babon dãṛãe họ.

Babon jagok̕ bhiṛre họ,
Babon jo̱ṭe̱do̱k̕ hạni nhạ̃i ṭhen,
Sapha sạphibon tahe̱na họ,
To̱be̱khange bańcao menak̕ họ.

Sạṅgiń sạṅgińbon tahe̱na họ,
Sor sopor do̱ alokhange,
Haere, haere, haere, Ko̱ro̱na do̱
Jo̱to̱kotebon laga ḍigire.
So̱nto̱r, so̱nto̱r, so̱nto̱rabon họ,
So̱nto̱rrege họ bańcao menak̕ họ,
So̱nto̱rrege jio̱n-mo̱ro̱n,
So̱nto̱rrege jio̱n menak̕ họ.

OKAENAPE HULGẠRIẠ?

Okaenape Baba Hulgạriạko?
Jarwalenpe 30 Jun 30 hajar,
Bhognaḍi ghuṭure re̱ť-te̱pe̱ť,
Cak̕ do̱ nisun teheń Bhognaḍi?
Siṛạgeťae Pańckạṭhiạ baṛe,
Kathae, o̱ṇḍe̱ge baṅ liṅgilen,
Hul reak̕ pạhil hubạk̕ hule hul.
Kaṭjibạ, kurmutạha sumạrlenkin,
Sãote 14 jo̱n saheb seta hõ̱,
Maṅgaṛ gupiko kol ocoen.
Salgaokedae Hul se̱ṅge̱l,
Gạrbhuak̕ mẽ̱ť arak̕en dugur,
Serma ṭuṅgạu aṛaṅ Hul, Hul.
Bir se̱ṅge̱l Hul salgaoen,
Goṭa ṭạṇḍi dhạu-dhạu.
Cete reak̕ Hul, cedak̕ Bul?
Nera niạ nuru niạ,
Ḍiṇḍạ niạ bhiṭạ niạ.
Mãyãm gaḍa liṅgilena,
Mãyãm kạlite khõ̱ṇḍena,
Apnar disạm, apnar raj,
Sona Santal Pargana!
Me̱nkhan nit?
Nit do̱ sagal-sagal Kena-Beca,
Kurmutạha Mahes Do̱ro̱ga.
Nera-nuru, jo̱l-jumi,
Jimạyen porer tire,
Ceka baṅ michạyen HUL?
Dak̕en mãyãm sạkiťena.
Gujuk̕ kũṇḍre Hul bõ̱ṅso̱, 
Hae! Okaenape Hulgạriạko?

AMAK̕ AṚAṄ

Mạhima amak̕ ạḍige maraṅ!

Saḍe goṭa ṭạṇḍi raṛaṅ-raṛaṅ,

Rak̕-ho̱mo̱r kan se̱ ar amak̕ ge̱raṅ?

Ro̱ṛ-landa kan se̱ ar amak̕ durạṅ?

Bhitri o̱nto̱r kho̱n onae halaṅ,

Onage moca ḍahar metak̕ko “Aṛaṅ.”

Menak̕ aṛaṅ janak̕ hõ̱,

Menak̕ aṛaṅ dareak̕ hõ̱,

Menak̕ aṛaṅ misinak̕ hõ̱,

Ar menak̕ aṛaṅ ruk-biritak̕ hõ̱,

Me̱nkhan -

Ona baṅ kan sabad,

Ona baṅ kan katha,

Ar baṅ do̱ ona kan pạrsi.

Bhạgangeako onko manwa,

O̱ko̱eak̕ do̱ menak̕ aṛaṅ pạrsi.

Saḍe onkoak̕ aṛaṅ ạḍi ṭaṛaṅ,

Onkoak̕ disom so̱maj ạḍi maraṅ!

E̱ am Santal!

Cekate unạk̕ matal,

Mohṇḍaenam patal,

Cedak̕ o̱bo̱rentam alaṅ?

Guṅgṛạyenam bạnuk̕tam aṛaṅ,

“Puthi kho̱n thutige so̱ro̱sa”,

Nit jug bo̱do̱len sạrige,

Poṇḍ goḍare he̱nde̱ ho̱ṛe̱c̕,

E̱rme, apho̱rme,

Ona jo̱mle ane̱c̕ge,

Oḍokok̕ amak̕ daman “Aṛaṅ”

Jive̱ťge do̱ho̱eme amak̕ “Aṛaṅ” 

Saḍeyme serma ṭuṅgạu raṛaṅ-raṛaṅ.

BOṄGA LEKAN HO̱Ṛ: P. O. BOḌIṄ

Cak̕ do̱ he̱mẽ̱ṛmẽ̱yo̱k̕, cak̕pe birạsạli?

Cak̕ do̱ go̱ṛo̱mińko unạk̕ do̱ dhimạliạ?

Bhabna alo, cintạ alo ar baṅ do̱ phikir,

Gitic̕kok̕pe galasaṅ kaḍa ạkriń niphikir.

Iń bidạl hõ̱ daralen dạkhnạhi ḍubạ dak̕,

Jug do̱ tahẽ̱kan ˗ Linguistic Survey of India.

Sạri Santali un do̱ baṅgeń mo̱so̱ť ocoať.

Je̱rakate sạbitlidạń apeak̕ge so̱ro̱s Santali,

E̱nte onkoak̕ do̱ deko sãote ghar ghạrien.

Bagaṛgea, cagaṛgea rạpuťgetako lipi sagaṛ,

Baṅ calak̕a, baṅ ṭikạuk̕a ona rạpuť ma sagaṛ.

Baḍaekan tahẽ̱giạń darakan din pạrsi niạ,

Ho̱ṭo̱k̕re limbạťkate sea mạṇḍiko ajo̱ape,

Onate̱ṛo̱ṅ atarkidạń jibo̱n ińak̕ pạrsi niạ.

Pon ge̱l pon serma muc̕ leka khaṭaokate,

Sanam lekan dho̱niń jogaṛ do̱ho̱ oṭoakať.

Nẽ̱hõ̱r ińak̕, aro̱j ińak̕, binti ińak̕ ańjo̱mpe,

So̱mo̱e ńamle ona baṛe̱ oṭak̕ak̕pe, oyoṅak̕pe.

Uṭi˗uṭi, khãp˗khãpre bạiṭhạuk̕ apeak̕ pạrsi,

Murại me̱nte ḍiksinạri ar pạrsi reak̕ jo̱to̱ ạri,

O̱lkate, sajaokate ona sanamiń so̱do̱r oṭokať,

So̱mo̱e ńamle ona baṛe̱ oṭak̕ak̕pe, oyoṅak̕pe.

Pạrsi apeak̕ o̱ko̱e bạiri hõ̱ baṅko to̱tho̱c̕ daṛeak̕.

HAERE MAENO!

Hae Maeno! Cedak̕ amge?

Amge cedak̕?

Aeno̱m-kajo̱r dibi saj,

Muluc̕ mẽ̱t̕hã gạwic̕ dilại,

Jhalak amak̕ ńe̱lte,

Bijli Rạni so̱ro̱mko̱k̕ae.

Cedak̕ amgem haṭa?

Jio̱n jharna, jio̱n juḍạsi,

Jio̱n dak̕, ạmrit jo̱l?

Haṭ-baṭ, mela-ṭhela,

Pata-chata, dibi-kạli,

Ar bo̱l gatek̕ ṭạṇḍi hõ̱.

Cedak̕ amgem haṭkok̕a?

Digdhạ meṭaotińme Maeno!

Am lasãṛhẽ̱t̕ Jio̱n dak̕? Ar se̱

Jio̱n dak̕ge am bhorsa?

O̱ko̱eṭak̕ben so̱ro̱sa Maeno?

Amge se̱ Jio̱n dak̕?

Re̱ṅge̱c̕ kan, kisạ̃ṛ kan,

Kãṛã ar se̱ gujạ,

Bachnao bạnuk̕ e̱se̱l-he̱nde̱,

Jo̱to̱ amren o̱ndata.

Cakha-cuṇḍuc̕ me̱lo̱t̕ate,

Emok̕aem hare̱-phare̱,

Ạ̃ṛti bạnuk̕ cakha cara,

Am ńe̱lte Jio̱n dak̕, ar se̱

Jio̱n dak̕ge sebelen?

Ma se̱ Maeno bho̱ṅạńme.

Ma se̱ Maeno jado̱ạn̕me.

Kuṛi, go̱ ar chạḍwi,

Nanan ruptam base̱?

Gharõ̱ńj ạsul ṭhikạ,

Amre aka menak̕.

Jo̱k̕-raca, isin-basaṅ,

Arhõ̱ no̱te̱ bale belteń,

Ho̱bo̱r-dipil hạni tora,

Jio̱n dak̕an caṇḍa cạṇḍi.

Ḍipṭi amak̕ ajhãṭgea,

Ạpsar kho̱n hõ̱

jhõ̱ńjho̱ṭgea.

Ce̱t̕iń kulim Maeno?

Amak̕ hanaso, amak̕ jala,

Bańjha he̱re̱l iń bạń baḍae,

Nãwãnkoko darae hanaso.

Kạbiak̕ ko̱lo̱m ṭhoṇṭa,

Rạput̕en Maeno,

Ańje̱t̕entae kạli.

Ro̱ho̱ṛ kagatre,

Ar baṅge o̱lo̱go̱k̕kan,

Amak̕ jibo̱n do̱ro̱so̱n!

Calak̕-calak̕̕̕̕̕̕̕̕̕̕̕̕̕̕̕̕̕̕̕ jivi te̱nen,

Hanko -

Purub, pạchim, uttạr, dạkhin,

Barnao ạcur cạriokoṇḍ,

Tuṛi do̱ho̱e jaega bạnuk̕,

Okare bạnui Maeno,

Okare banuk̕ Jio̱n dak̕.

Haere Maeno!

Haere Jio̱n dak̕!

Abenge Pilcu,

Abenge Liṭạ,

Abenge porodhol.

Oka ḍaharben sotok̕ idile?

Abenge ma uduk̕aleben.

PẠRSI MALA

(1)

Sim hõ̱ko rak̕keda, marak̕ hõ̱ko hẽ̱yõ̱keda,

Aṅgaena bạbu, puṭạk̕en biṭi de̱ beret̕ben.

Sạrdi jạput̕ jhar˗jhar, pạrsi kạmi jhaṛ˗jhaṛ,

Oḍoṅenko bạbu, bahe̱renko biṭi disom ho̱ṛ,

Cak̕ do̱ menak̕ben haere! Cak̕ do̱ galasaṅ?

(2)

Ti kạṭup̕ ko̱lo̱mtaben, ho̱ṛmo̱ mãyãm sihạitaben,

O̱no̱l˗bo̱no̱l bạbu o̱lben, kạri˗bạchi biṭi garben,

Santal ma bạihạṛre! Pạrsi nayotaben birạsạli!

Pạrsi nayotaben gạrsilo̱m, rak̕˗ho̱mo̱r dayage!

Haere pạrsi nayo, haere pạrsi nayo birạsạli!

(3)

O̱l maliń o̱l ạpuń, o̱no̱l˗bo̱no̱l, kạri˗bạchi;

Sajao hõ̱liń sajao nạpuṅ, sonerao Jive̱t̕ Aṛaṅ,

Sat rạṅgin pạrsi baha, aṭal goṇḍal pạrsi baha,

To̱ko̱e lạgiť pạrsi baha, to̱ko̱e lạgit̕ pạrsi mala?

To̱ko̱e ho̱ro̱g nạpuń, to̱ko̱e do̱e baha mo̱so̱da?

(4)

Pạrsi ma baganre, pạrsi bahawakan lo̱do̱be˗lo̱do̱p̕,

Gutuiben bạbu, galaṅben biṭi saṛ baha bomborkoť,

Nana ro̱ṅ saṛ baha, hilại hisiť so̱ baha so̱ndhaṛge,

Ho̱ṛko tolas bạbu, ho̱ṛko bahae biṭi, ho̱ṛko mo̱so̱da,

Ho̱ṛko sarhaoben, ho̱ṛko õ̱ṛhẽ̱ben biṭi tire˗juge!

AŃJO̱MKATALEM!

E̱ họ, daṛean! E̱ ho̱, raj bạhdur!

E họ, bin mukuṭan raj!

Ombak̕˗ikṛum ko̱e˗ạrji,

O̱nto̱r tuli bhumbukok̕kan,

Rak̕˗ho̱mo̱r serma ṭuṅgạu,

Co̱ro̱n dige rãwãok̕kan,

Lenda amren porjakoak̕,

Ańjo̱mkatalem rak̕˗ge̱raṅ.

Alom e̱male sea mạṇḍi,

Alom ajo̱ale sea daka.

Baṅ uduk̕kan,

Baṅ bo̱lo̱k̕kan,

Hạkĩạ do̱yo̱k̕ bahe̱rok̕kan.

E̱ họ, bin mukuṭan raj!

E̱ họ, daṛean! E̱ họ, raj bạhdur!

Ańjo̱mkatalem rak̕˗ge̱raṅ.

E̱ họ, bin mukuṭan raj!

Daṛetamtem ko̱bo̱jket̕le,

Duạr˗duạr goṭa duạr,

Bin aleak̕ me̱njo̱ṅ,

Aka pe̱re̱c̕, tukạ pe̱re̱c̕,

Jo̱bo̱rjạsti mit̕ ạnạṛi pạrsi,

Ale gocharem dumhạwat̕le.

E̱ ho̱, bin mukuṭan raj!

E̱ họ, daṛean! E̱ họ, raj bạhdur!

Alom bagaṛ sonali pạrsitale,

Ańjo̱mkataleme ge̱raṅ aleak̕.

AŃCAR DO̱TAM MẠILẠKEDAE

O̱nto̱r paṭae ńũtạtkeda.

Rạnu reak̕ sea mạṇḍi,

Digdhạ kạridaṅ ńũt,

Hataṅ, inbo̱ro̱, daṛe

Je̱re̱ť sapha, riṭhạkedae.

Jạt o̱ko̱ḍa sạbut menak̕a,

Pocra mucạť ḍhạ̃ṛkanlaṅ.

To̱be̱te̱ṛo̱ṅ bhagwa tul,

Bo̱to̱r jala hupuc̕-hupuc̕,

Hạni tora caṇḍbo̱l tul,

Ńir bạgi dea giḍi,

Kathae baro̱ dolan gaṛ,

Lilibici Campa lilạmen.

Pạtiạu bạnuk̕ saṛtam mẽ̱ť,

Jo̱l, jumi, bir-pakaṛ,

Sanam do̱kho̱l, ujạṛena.

Payo kanlaṅ aṅgo̱cme,

Ar bakhan cekate?

Madho̱ Siń siń sado̱m,

Han-han, hin-hin,

Mẽ̱ť samaṅrey ci hõ̱hõ̱e.

Nagam amak̕ siṛạgeťae,

Dạdạṛtege menam nit hõ̱,

Baha Bandelae, To̱ṛe̱ Pukhori,

Sãtbhumren hae Santal!

Nit hõ̱ menam dạdạṛtege.

Bạrin-Bạgṛi-Bo̱rdo̱man,

Namal kạmi akal-sukạl,

O̱n paro̱m Gaṅ Nạ̃i,

No̱te̱ Dilli-Mumbại, ar

Kasko̱mbir (Kạsmir),

Oka-oka baṅ re̱ṅge̱c̕ jala,

Jaṭal koṭal hae pe̱ pại tala!

Hapṛamkoak̕ miť \tho̱p,

Hińjiť ańje̱ťen alaṅre,

Dulạṛ-duplạṛ sãota tala,

Mạrkhu marao haere jala!

Miť phuṛuk̕re abo̱l jumi,

Bo̱lo̱ sambaoen bo̱to̱lre.

Guṛdak̕ bo̱lo̱en,

Kasadak̕ oḍoken.

Sui leka bo̱lo̱en,

Pal leka darena.

Paṭ gaṇḍo osaren,

Jel hõ̱ko jo̱mkeť,

Mãyãm hõ̱ko hõ̱ṅgo̱rkeť.

Unạk̕ ro̱ḍo̱c̕, unạk̕ ko̱clo̱n!

Ańcar kathayem danade.

Mãyãm pańja dukạnlenre,

Arak̕-poṇḍ be̱ṅge̱ťtam,

Siṇḍ-bhaṇḍ e̱ge̱rtam,

Tạrup̕ lekam hạṇḍrạuk̕,

Uni ṭhen do̱ sikup̕ thir, 

Ańcar do̱tam mạilạkedae!

CEDAŃ DO̱SE KUṚI?

Dại kan co̱m mại?
E̱nte am do̱ kuṛi ho̱po̱n.
Rit kan duniạ reak̕,
Amaṅ nana rup nana ro̱ṅ,
Ạgulemre dada-hili,
Idilemre didi-teńaṅ,
Me̱nkhan, am
Abhran kanam,
Gharõ̱ńj, so̱maj ar disạm,
Amge sirjo̱niạ Pilcu buḍhi.
Am be̱go̱r mit̕ buḍạk̕,
Gharõ̱ńj oka hõ̱ baṅ laṛaok̕,
Onate amaṅ go̱no̱ṅ,
Hirạ-muti kho̱n hõ̱ bạ̃ṛti,
Bạ̃ṛti ar bạ̃ṛti...ar bạ̃ṛti...!
Onkan bạ̃ṛti go̱no̱ṅan dho̱n,
Ińaṅ ti kho̱n uḍạu ado̱k̕,
Cedak̕ bạń rag,
Cedak̕ bạń ho̱mo̱r halaṅ?
Am khạtir, am rạkhim khạtir,
So̱maj rilạmala, disom khạtir,
Ceka do̱sledako hapṛamko?
Ceka ghạṭledako purkhạko?
Baro̱ dolan gaṛ, baro̱ jo̱ṛ sagaṛ,
Mit̕ ńindạte, mit̕ likre lagakedako,
Jạtgeko bo̱to̱rada bhạire bhại,
Gaṛ do̱ bako dayawat̕,
Bhạire bhại Madho̱ Sińak̕ bo̱to̱rte,
Bhạire bhại gaṛ do̱ko bạgiadare.
Nitoṅ hạni po̱rer culhạ,
Curạmare o̱k̕o̱ṅkan,
Saṛ tahe̱n bhorge ńe̱le̱-dumur,
Inạkate do̱ mo̱so̱t̕ ńũruk̕.
Ragạń, ho̱mo̱rạń am lạgit̕,
Daṛe katha bạnuk̕ iń ṭhen,
Amge hirạ muti, Maenomạti,
Ińaṅ katha bujlere RAN,
Ar baṅkhan do̱ SAHAN.

JOHAR HULGẠRIẠKO!

Johar, Johar, Johar Hul Johar!
Johar, Johar, Johar jo̱to̱ko,
Johar Subạ Ṭhạkur!
Johar sanam mãyãm gohako!
Joharak̕kanle apeak̕ dil, daṛe ar
Johar apeak̕ disom dulạṛ.
Sabad bạnuk̕ ale ṭhen,
O̱bo̱ren alaṅ aleak̕,
Ko̱lo̱m ṭhoṇṭa rạpuťen,
Sạmud kạli hõ̱ ańje̱ťen,
Apeak̕ mạhima o̱ho̱ge lạilen,
Ape dọ Boṅga lekan ho̱ṛ,
Ape do̱ sạrige so̱no̱t ho̱ṛ,
Jọi jitkạr ape mãyãm gohako!
Ghurạ phiri dhạrti ạcur ruạṛen,
Ale menak̕le baba arhõ̱ e̱ṃḍe̱ge,
Okare do̱ baba apepe thamgạḍilen,
Ape kho̱n hõ̱ aleak̃ halo̱t,
Ar ce̱ťle lạia Baba?
Serma duạra kho̱n,
Mẽ̱ť pe̱re̱c̕mape tạṅkhikange,
Haere Babale kalaṅ ḍolaṅen.
O̱kte̱ reak̕ge phãk menak̕a,
Bakhan bạnuk̕ ce̱ť hõ̱ begar.
Hẽ̱, me̱nkhan lạire lajao,
Ape do̱ ho̱k lạgiťpe dãṛẽ̱yena,
Ar ale do̱ be̱ho̱kle ho̱bo̱rakada.
Johar baba, bańcaokalepe!

CETE REAK̕ TOPOT̕?

Cete reak̕ topot̕?

Cete reak̕ kạphạri?

Cete reak̕ be̱ne̱-bạiri?

Mit̕ ṭhenlaṅ kucạlena,

Mit̕ toalaṅ je̱mbe̱t̕len,

Haere hae dhạrtire do̱!

Balaṅ saho̱p̕len.

Nagam reak̕ anacurre,

Apat̕enlaṅ, begarenlaṅ;

Nagamiạko sạbit oṭokat̕,

Amaṅ ro̱ṛ, amaṅ rạṛ,

Le̱ske̱˗be̱ḍe̱r bo̱ḍe̱yen,

Deko sãote ghar˗ghạrien,

Kabra koṭha gabaoen,

At̕kedam amak̕ oprom,

Pheraoenam bardũṛũc̕re,

Dạlil noa baṅgem aṅgo̱c.

Saṅge ale boeha amren,

Taseyenle, tarseyenle,

Goṭa Nepal, Baṅglade̱s,

Mit̕getale ro̱ṛ˗landa,

Mit̕getale e̱ne̱c̕˗sereń.

Sạri noa nạthien,

Giyạrso̱nak̕ bạhire.

Sạkhi kanae nagam,

Mẽ̱t̕ marsal baṅre hõ̱,

Ńe̱ńe̱lkoak̕ ho̱ṭo̱rlet̕le mẽ̱t̕,

To̱be̱te̱ṛo̱ṅ HUL niạ,

Mit̕ judạ disom sirjạulena.

Jumi niạge HUL do̱ baṅ,

Pạrsi HUL hõ̱ salgaolena,

Ona reak̕ bijir˗bilis,

Pạrsi baganre bahaena,

Nana ro̱ṅan saṛ bahako.

Baṅ kana re̱pe̱c̕ ciki reak̕,

Baṅ kana kạphạri lipi reak̕,

Amaṅ ro̱ṛ, amaṅ landa,

Sạgunkok̕ ma amaṅ racare.

"Cupud sumuṅ jivi abinag,

Cag do abin galoceda?

Saṅgi hoṛre ladi lagid,

Abinag ona bagaṛ Santaṛi."

Dho̱ro̱m reak̕ ạphim sãote,

Cak̕ do̱m ghaṇṭaet̕ o̱l cemed?

Jumi˗jagako lilạmet̕kan,

Era˗ho̱po̱nko santaoet̕le,

Onko sãote cak̕ do̱ haere,

“Mit̕ gaṇḍo, mit̕ mạci.”

Dinạ-rate go̱so̱ṅ-go̱so̱ṅ.

Amaṅ racare amaṅ akhṛa,

Ińaṅ racare ińaṅ akhṛa,

To̱be̱rege akhṛa sohanok̕.

Bạrphại menak̕ onarege,

Suluk̕ seteńok̕ onarege,

Balaṅ topot̕ boeha kanlaṅ,

Bạiri de̱ ma oromkolaṅ,

Bạiri baṅkhan merel-merel,

Jaejug lạgit̕ bhaṇḍankalaṅ.

BHIḌI HARTA TẠRUP̕

Sedae do̱bon tahẽ̱kana Cại˗Campa gaṛ,
Cại˗Campa gaṛ do̱bon bạgiada rẹ.
Jạtgebon bo̱to̱rada gaṛ do̱ babon dayawať,
Cại˗Campa gaṛ do̱bon bạgiada rẹ.
De̱ntiń naego̱ sar˗kạpi,
De̱ntiń naego̱ yurmạl˗pạigạn.
Darahara Campa gaṛ,
Campa gaṛ do̱ń ropha ruạṛa.
Purub-pạchim bạiri bạbu,
Jhalmal-jhalmal darakokan,
Nato-ṭola disạmge do̱ ḍamaḍol,
Nato-ṭola disạmge do̱ hale ḍhaleyen.
Sedae lạṛhại sar-kạpi,
Nahak̕ lạṛhại kạli-ko̱lo̱m,
Kạli-ko̱lo̱m sar bạbu sajaome,
Kạli-ko̱lo̱m sar bạbu de̱ se̱ bojaome.
Bhiḍi harta bạiri bạbu,
Ho̱ro̱k̕akan huṛạt̕akan.
Bhiḍi harta bạiri bạbu jo̱ho̱r khurạni,
Bhiḍi harta bạiri bạbu bis suṅghạni.
Baṅko teraṅ sar-kạpi,
Baṅko he̱se̱y ho̱ṭo̱k̕ nạ̃ṛĩ.
Bo̱ho̱k̕ hataṅ mãyãmreko je̱mbe̱ť,
Jõ̱k leka mãyãmgeko cusạu nańje̱da.
So̱nto̱r so̱nto̱r so̱nto̱r bạbu,
Bhiḍi harta tạrup̕,
Bhiḍi harta tạrup̕ bạbu sagal-sagal, 

Bhiḍi harta bạiri bạbu noromkotam rẹ.